3
1 על משכבי בלילות בקשתי את שאהבה נפשי בקשתיו ולא מצאתיו׃
2 אקומה נא ואסובבה בעיר בשוקים וברחבות אבקשה את שאהבה נפשי בקשתיו ולא מצאתיו׃
3 מצאוני השמרים הסבבים בעיר את שאהבה נפשי ראיתם׃
4 כמעט שעברתי מהם עד שמצאתי את שאהבה נפשי אחזתיו ולא ארפנו עד שהביאתיו אל בית אמי ואל חדר הורתי׃
5 השבעתי אתכם בנות ירושלם בצבאות או באילות השדה אם תעירו ואם תעוררו את האהבה עד שתחפץ׃
6 מי זאת עלה מן המדבר כתימרות עשן מקטרת מור ולבונה מכל אבקת רוכל׃
7 הנה מטתו שלשלמה ששים גברים סביב לה מגברי ישראל׃
8 כלם אחזי חרב מלמדי מלחמה איש חרבו על ירכו מפחד בלילות׃
9 אפריון עשה לו המלך שלמה מעצי הלבנון׃
10 עמודיו עשה כסף רפידתו זהב מרכבו ארגמן תוכו רצוף אהבה מבנות ירושלם׃
11 צאינה וראינה בנות ציון במלך שלמה בעטרה שעטרה לו אמו ביום חתנתו וביום שמחת לבו׃
Read in another translation
DE Lutherbibel 1912 Des Nachts auf meinem Lager suchte ich, den meine Seele liebt. Ich suchte; aber ich fand ihn nicht. EN World English Bible1997 By night on my bed, I sought him whom my soul loves. I sought him, but I didn't find him. FR Traduction de Louis Segond 1910 Sur ma couche, pendant les nuits, J`ai cherché celui que mon coeur aime; Je l`ai cherché, et je ne l`ai point trouvé...